آئی سی سی ویمنز ٹی ٹوئنٹی ورلڈکپ؛ پاکستان نے ویسٹ انڈیز کو شکست دیدی

آئی سی سی ویمنز ٹی ٹوئنٹی ورلڈکپ میں پاکستان نے ویسٹ انڈیز کو8 وکٹ سے شکست دیدی.

کیریبیئن ٹیم نے ٹاس جیت کر پہلے بیٹنگ کا فیصلہ کرتے ہوئے 7وکٹوں کے نقصان پر 124 کا مجموعہ حاصل کیا، سٹیفنی ٹیلر اور شیمین کیمپبیلی نے 43،43 رنز کی اننگز کھیلی، ان کے سوا صرف ایک کھلاڑی لی این کیربی (16) ہی ڈبل فیگر میں داخل ہوسکیں، ڈیانا بیگ، ایمن انور اور نداڈار نے 2،2 شکار کئے جب کہ ایمن امین نے ایک وکٹ حاصل کی۔

ہدف کے تعاقب میں جویریہ خان(35) نے پاکستان کو اچھا آغاز فراہم کیا، بعد ازاں منیبہ علی 25 رنز بناکر آﺅٹ ہوئیں تو ٹوٹل 77 تھا، بسمعہ معروف اور ندا ڈار نے پر اعتماد بیٹنگ سے فتح کی جانب سفر جاری رکھا،پاکستان نے ہدف 10گیندیں قبل عبور کرکے 8 وکٹوں سے کامیابی حاصل کرلی، بسمعہ معروف38 اور ندا ڈار 18پر ناقابل شکست رہیں۔